И оваа година рудникот Саса подели празнични бонуси за вработените, новогодишни пакетчиња за децата и 150 хуманитарни пакети за социјално ранливите групи од Македонска Каменица.
Традиционално пак, на новогодишната ноќ, претставници од менаџерскиот тим на САСА ќе ги посетат вработените во рудникот, како и дежурните тимови на брзата помош, противпожарната единица и полицијата во Македонска Каменица кои ќе ја дочекаат новата година на своите работни места, при што ќе им дадат подароци.
„Ова е посебен период од годината кога сите посакуваме да добиеме подарок и порака со желби за среќа, добро здравје и успех во новата година. Затоа ние како компанија сме среќни и благодарни што имаме можност да помогнеме сите кои се дел од оваа заедница, особено децата и ранливите семејства, да ја почувствуваат радоста и магијата на новогодишните празници. Се разбира, сакавме да ги наградиме и нашите вработени кои покажаа голема посветеност во работењето и вложија голема енергија во реализација на нашите капитални инвестициски проекти кои треба да обезбедат одржлив развој на САСА во годините што следуваат“, изјави генералниот директор на САСА, Крис Колбурн.
