По 5.000 ден. награда ќе добие секој работник, сега вработен во Мода и Камотекс доколку на еден или на друг начин придобие вработен од друга компанија .
„Идејата е од нашите сопственици од Германија, во чии компании овој начин на работа се покажа успешен. Наградата ќе се исплати заедно со месечната плата во месецот во кој новиот работник остварил 100% од нормата“, истакна Ангел Димитров менаџер на МК „Мода“ – Св . Николе.
Потегот на овие две светиниколски фирми, само ја потврдуваат големата потреба од работници и фрлената ракавица кон останатите фирми за поголеми плати и подобри услови за работа.
„ Очекуваме да донесат искусни работници, кои некогаш биле наши работници и сега работат во компаниите од ТИРЗ зоната во Штип“, вели Димитров.
Во моментов, кусок на работници имаат сите и за Синдикатот, ова е добар момент оние што останале во Државата трудот добро да го наплатат.
Инаку, просечната платата во Мода во јануари е зголемена за 15 % и сега таа , според Димитров изнесува 30.000 ден. Со новиот пораст на минималната плата, просекот ќе достигне 33.000 денари.
