Регулаторната комисија за енергетика во понеделник ќе ги презентира тарифните модели по кои ќе се одредува цената на електричната енергија согласно потрошувачката. Оттаму информираат дека сите дилеми кои потрошувачите ги имаат и ги поставиле до РКЕ во однос на скалесто тарифирање се земени во предвид во анализите:
„ Главната цел на воведување на скалестото тарифирање е да се формираат блок тарифи што ќе стимулираат намалување на потрошувачката на електрична енергија во текот на високата дневна тарифа, а ќе стимулираат поголема потрошувачка во ноќната ниска тарифа, и со тоа да се обезбеди заштита на домаќинствата чија потрошувачка на електрична енергија е во рамки на просечната потрошувачка во државата“, се наведува во денешното соопштение од РКЕ.
Со ваквиот начин на тарифирање регулаторите тврдат дека ќе се обезбеди фер пристап, односно оние коишто трошат значително поголеми количини на електрична енергија од просечната потрошувачка, ќе плаќаат и повисока цена за истите.
Првите симулации на плаќање според новиот тарифник велат дека домаќинство што троши по околу 1 000 киловатчасови електрична енергија во скапа тарифа, ќе плаќа околу 40 проценти повисока сметка за струја отколку во моментов. Домаќинствата, пак, што трошат помалку од 500 киловатчасови месечно во висока тарифа, би требало да имаат исти или помали сметки за струја. Конечните гранични вредности меѓу тарифните модели, можат да претрпат измени.
Блок тарифите ќе се применуваат само во периодите на високи дневни оптоварувања од 07:00 до 22:00 часот, додека во периодите во ниски дневни оптоварувања од 22:00 до 07:00 и недела ќе се применува иста цена.
